Polideza

Espelunga d'o dragón - Pintura

2009-10-27T10:37:00.003+01:00

Espelunga d'o dragón
Olio y tinta china sobre lienzo, 65 x 54 zm
© Chuan Chusé Bielsa
A la benda
Se pueden fer ofertas - artebielsa@gmail.com

Ista ye a mía zaguera obra pictorica, "Espelunga d'o dragón". Ye una pintura ta soniar, ta meditar en ixos mundos lexanos que abitan dentro de nusatros. Mundos lexanos porque os roídos d'o mundo, que a begadas parixen no rematar nunca, nos deseparan d'a nuestra medolla, d'o más poliu d'os camins: o d'a felizidà.

Tiengo ista obra aquí a o mío costato tanimientres escribo istas linias; fa bels intes l'he feito una fotografía, que podez beyer en alto. Y ye berdà _pienso_, ixa foto no fa denguna chustizia a o cuadro. De seguro me caldrá fer-ne más, de fotografías, ta que s'amanen anque sólo siga una miqueta a tot ixo d'esenzial que a pintura espresa. As colors que parixen danzar en a obra no quedan reflexatas como cal en a imachen fotografica.

Ista "Espelunga d'o dragón" ha reposato bels días en o mío taller-estudio-cambra-de-meditazión, y seguntes a mía sensibilidà ha ito ganando polideza. A begadas pasa ixo, que os cuadros naxen y ban crexendo, alquieren un bibir suyizo, y nos charran; parixen personas, a begadas pueden dezeuzionar-nos una miqueta con o pasar d'o tiempo y a ormino pasa tot o contrario: nos sosprenden, ban puyando en altaria espiritual, se desbeilan y nos desbeilan, se tornan en paradigma de l'amistanza, capables de coloriar os camins d'a esistenzia.

Bi ha cuadros umildes que amagan paisaches que tienen a potenzialidà de menar-nos enta camins que merexen a pena, ye dizir, aquels que dan paz y nos amanan más a o sentito que imos buscando en a bida. "Espelunga d'o dragón" ye uno d'istos cuadros. Dende a suya ubicazión terrestre quiere biachar en esprito enta planetas goyosos. Creigo que poderba cumplir muito bien o suyo ochetibo en cualsiquier casa bonica (ye dizir, en cualsiquier casa do bi aiga ilusions e inozenzia), apuntando perén enta la frescor d'os suenios.

En cualsiquier caso, yo ya he columbrato bels paisaches calmos enta os que biachan as suyas colors diamantinas. A las que ziertamén no fa chustiza la foto que i meto en alto (definitibamén abré de fer-ne belatra...)

Chuan Chusé Bielsa

Cal una Lai de Lenguas t'Aragón

2009-04-13T01:34:00.009+02:00

Tierra de poesía
Pintura (en dos partis) de Chuan Chusé Bielsa - Bendida

Sisquiá bel día se faiga la Lai de Lenguas... ta l'Alto Aragón y a francha catalanoparlán. Como dizen os oczitans: "jutjarem l'arbre a la frucha", ye dizir, solamén cuentan as OBRAS, no pas as promesas.

Pero ye que en Aragón tamién bi ha un riquismo patrimonio lingüistico en zonas como lo Baxo Aragón istorico de lengua castellano-aragonesa, por exemplo, que se'n ba perdendo bien apriseta. En que se mueran bellas chenerazions no en quedará cuasi cosa.

A mida que pasan as decadas, cada begada ye muito más difízil mantener y recuperar ixe erenzio lingüistico. Estamos aguaitando en direuto un lingüizidio.

Cuan yera nino, ixe patrimonio yera literalmén CHIGÁN. Agora o desastre ye TOTAL. O mundo en o que bibié de nino ha dexaparexito, y de cosa sirbe bel museyo muerto.

Si yo aimo l'aragonés ye por as parolas que charraba de nino y por onrar a las personas que más he querito en ista bida, que charraban un riquismo aragonés residual (u "repuyal"). Ixas chens sí que yeran ARAGONESAS. Agora... ¿án ye Aragón? A lengua bernacla ye l'alma d'una tierra, cuaque a beluns u no cuaque.

Chuan Chusé Bielsa

O camín d'as estrelas

2009-02-17T11:39:00.010+01:00

O camín d'as estrelas
Olio sobre tabla, 60'7 x 48'5 zm
© Chuan Chusé Bielsa
A la benda
Se pueden fer ofertas - artebielsa@gmail.com

Bellas pinturas son o resultato d'una mena de machia. Recuerdo: o prozeso de pintar "O camín d'as estrelas" representó en reyalidà un danze; as mans y tot o mío ser yeran danzando tanimientres pintaba. No bi abió un esfuerzo conszién, denguna luita ta concretar formas u colors. As formas amanexioron en a tabla imprimata d'una traza natural. Y no i fize denguna correzión. En poco más d'un día o cuadro yera feito, naxendo dende una primichenia tierra d'o ritmo.

Charrando de "fer" arte, ta yo a parti más importán ye a preparazión mental, a meditazión, o feito de chugar meditatibamén con colors y formas. Y tamién cal silenzio, un gran espazio bueito an o ego tienga la oportunidà de desaparixer. Si l'artista tien as nezesarias abilidaz teunicas _alquiritas dimpués de muitas añadas d'aprendizache y treballo_, cuan plega o inte d'a creyazión, ye preparato ta materializar sin más dilazión o Esprito en formas fenomenicas. En reyalidà, o infinito ye chugando amorosamén a trabiés de l'artista.

Creigo en o treballo duro, pero a o mesmo tiempo tamién creigo en o que comunmén se clama inspirazión. Os poemas de yo que más me cuacan estioron feitos seguindo una nezesidà imperiosa que cosa tien a beyer con teunicas u artifiziosidà. En l'antiga China os millors pintors clasicos beyeban o prozeso de creyazión d'una traza parellana. Y o mesmo puede ser dito d'o Zen en o Chapón.

Chuan Chusé Bielsa

"Ausenzia", pintura a la benda

2009-01-20T00:37:00.024+01:00

Ausenzia
Pintura orichinal de Chuan Chusé Bielsa
Olio sobre lienzo, 60 x 73 zm
290 euros (Oferta)

Si deseyas tener u te cal una polida pintura orichinal, sin de dudas "Ausenzia", pintura a l'olio, achunta cualidaz que pueden fer que te'n enamores. En istos mesmos intes, tanimientres escribo istas linias, tiengo ista pintura a o canto de yo, en o mío estudio, chunto a libros y a atras cosetas mías.

Siempre me cal arrodiar-me con obras d'arte que implan o mío esprito de paz y polideza, y en iste sentito, "Ausenzia" cumple de raso ixos ochetibos. Sin de dudas ista pintura puede satisfer as espeutatibas de cualsiquier persona que aime l'arte.

En ista botiga perén bi abrá pres espezials no solamén ta la chen que charre u conoxca l'aragonés, sino simplamén ta la chen que lo aime y que creiga que tien dreito a la superbibenzia, como fabla milenaria d'Aragón.

O pago se fa a trabiés de Paypal, y cuenta doncas con todas as guaranzias d'iste sistema de pago. Si deseyas pagar con atros sistemas, por fabor mete-te en contauto con yo emplegando lo correyo eleutronico. Tamién puedes fer sebir o correyo ta cualquier informazión u duda. Te contestaré antis con antis, de forma personalizata.

O pre d'o cuadro ye de 290 euros (oferta), gastos d'imbío incluyius. Iste pre solamén en iste blog t'aimans de l'aragonés. Puedes pagar-lo perfeutamén a terminos (u plazos). Si te cuaca tener una polida obra d'arte no te trestuques por o pre. Puedes fer-me tu tamién una oferta sobre lo que puedes pagar. Tot puede tratar-se. Os plazos de deboluzión son os establitos legalmén. Con a guaranzia de Chuan Chusé Bielsa.

Chuan Chusé Bielsa

A reina Agyness

2008-12-13T05:26:00.003+01:00

Somos en o futuro.
Podemos beyer a Agyness
anunziando una nueba era.

Isto ye o esdebenidero :
balanza, equilibrio.
Y compasión. Meditazión.

Agyness: posizión correcta,
capeza y espalda aliniatas,
buen pensamiento, buena aizión.
Serenidà. Pazifica luminaria
ta os luengos camins.

O futuro puede ser felizidà
u caos.
Pero aquí beyemos a Agyness
güellando enta distanzias
con suenios de luz y d'eleganzia,
anunziando solamén
felizidaz claras y posibles,
siñalando una asperata
nueba era, sin tantas de radizes
naxendo sobre odios.
Anunziando claredà,
azuls esplendidos _finalmén ista begada.
Azuls plenizos de goyo. Almas
sin cansera.

Aquí fa la suya dentrada
la reina
Agyness.

Somos en una nueba era.
Nueba Grezia.
Nueba democrazia.

Y a muller _ista begada_
endrezando, acotraziando
paz y chustizia sobre a Tierra.
Libertà alta.

Kim Kardashian sobre o camín bioleta

2008-12-13T03:53:00.002+01:00

Ye un poema. Una pintura.
Una rosa _una muller_ caminando
sobre colors
espirituals.

A tuya bida, o tuyo caminar
ye bioleta.

Y tuyas son as rosas,
tuyo ye o reino dorato
en o chardín d'amor.
Armonía d'aromas.

A reina ye danzando,
quedamén,
sobre o camín bioleta.
Luscos. Albas
silenziosas,
amorosas.

Kardashian sobre colors
escoscatas, sobre un río de machia,
caminando como diosa
sobre auguas, sobre espazios,
sobre orizons en gloria.

Polideza :
alma de muller,
chardins en o paradiso,
eterno perfume de rosas.

Agyness Deyn, chenuina eleganzia

2008-10-05T15:37:00.013+02:00

Agyness Deyn
Una eleganzia pleniza de frescors

A modelo britanica ha consolidato a suya posizión como un punto de referenzia en o mundo d'a moda

A Agyness Deyn no li calen comparanzas con atras modelos ta enfortir a suya influenzia, y ye claro que no li calen clichés como ixe d'estar "a nobalizia Kate Moss".

Agyness tien una serena eleganzia, mainifica, y a o mesmo tiempo muito natural. Y perén comunica ixa eleganzia suya a tot o dentra en contauto, tot o que toca remane transfigurato en machica polideza. Cosa ye combenzional en a suya presenzia. A suya feminidà ye funda, distinguita, plena de sotilezas. A suya absoluta feminidà rechuma un perfumo carauterisco de libertà.

Si contemplamos sin prechudizios a Agyness, no podemos beyer siñals d'androchinia reyal en ella. Bien, ixa ye a o menos a mía opinión y perspeutiba. A iste respeuto no soi d'alcuerdo, ye de dar, con a chen que proclama prezisamén ixo, que apunta treitos androchinos en relazión con a suya persona u más bien con o suyo estilo.

Agyness amanexe como una obligata referenzia ta una muller a la que no cuaca identificar-se con estereotipos que pueden tallar as alas de beluna d'as suyas potenzialidaz. Agyness ye una mena de simbolo d'o millor d'o nuestro tiempo, d'una belleza no combenzional y libre. Con muito, muito de misterio. Giorgio Armani fizo a eleuzión más enzertata en eslechir-la como una d'as caras d'a suya interpresa.

Agyness ye Agyness, increyiblemén unica. De siguro que l'autual tendenzia a enfatizar as grans posibilidaz que un pelo curto de muller puedo ofrir a la suya aparienzia ye en buena parti debito a ella. Ya siga con o suyo pelo royo platino, ya siga con o suyo pelo escuro, Agyness Deyn perén comunica una eleganzia funda y pleniza de frescor ta os nuestros tiempos y dillà.

- Puedes besitar tamién o mío blog Artebielsa, d'arte y poesía en aragonés.

L'arte y o mundo d'a moda

2008-08-23T13:34:00.017+02:00

Moda y arte, felizmén casatos
A polideza puede adoptar muitas formas y “bestitos”.
(Foto: ÚNICA magazín)

En o Budismo Zen bi ha muitos camins ta aconseguir paz interna y sabiduría. Y en cheneral en o Chapón, por exemplo, no bi ha una clara diferenziazión entre o que poderban clamar-sen artes y artesanías. O más umilde treballo manual puede tornar-se en una mainifica endrezera enta la comprensión d’a Reyalidà más funda.

D’a mesma traza, creigo que potenzialmén muitas autibidaz pueden ser transformatas en berdadero arte si se reyalizan con umildà, esprito de reberenzia, meditazión y o nezesario (y contino, ya que nunca no remata) aprendizache. Mesmo l'aparenmén chiqueta autibidà d’escribir en un blog puede tornar-se en una esperienzia meditatiba y en un arte...

No bi artes menors.
Poesía y meditazión.

A os pintors y artistas d’Orién perén lis cuacó barrechar diferens artes y disziplinas. Asinas, podemos trobar muitas begadas cómo un poema forma parti d’una pintura, describindo as sensazions y esperienzias que o mesmo artista u una atra persona ha esperimentato de resultas d’a suya contemplazión.

Siempre me cuacó ixa aprosimazión.

Y en o Zen, como ya d’antis he socherito, no bi ha particularmén artes mayors y menors.

En o anterior coinzido plenamén, ye dizir en sentiu estricto no creigo que bi aiga artes superiors a atras, si l’artista reyaliza o suyo treballo tenendo como alazez a poesía y a contemplazión. Poesía, en reyalidà (y en o sentiu en o que os antigos griegos la entendeban) ye o ligallo entre os ombres y a mente unibersal. Contemplazión y meditazión son un exerzizio de rezeutibidà, d’estar ubiertos enta una zierta transzendenzia, umildà, Silenzio. A lo menos asinas ye como yo as beigo.

Un pintaire en as tierras d'a moda

Asinas, cuan m’enfrento con aparenmén mundanas autibidaz como a moda, estilos, tendenzias... beigo tot ixe mundo con os güellos d’un pintaire y un poeta, con un sentiu de reberenzia en muitos casos, i puedo beyer marabillosas combinazions de colors, delicatos matizes, beigo ritmos rebutitos de creyatibidà, testuras sosprendens. Beigo a la fin en muitos casos un onesto esfuerzo ta espresar-se artisticamén a trabiés de bestir o cuerpo umano.

Y cuan as modelos son en a pasarela en as desfiladas, si as modelos y os diseñadors fan feito lo suyo treballo con amor y profesionalidà, i puedo beyer reyals obras d’arte, un arte bibién, “body art”. Mesmo i beigo bien polidas pinturas sobre os cuerpos elegans y desfilando d’as modelos.

Frescors y eleganzias de berano
A muga ye a eleganzia.
Cuan a eleganzia ye perdita, cuasi tot ye perdito...
(Foto: ÚNICA magazín )

Os diseñadors de moda no son guaire diferens de nusatros, os pintors, Talmén beluns de nusatros creigamos tener un más gran sentiu d’a transzendenzia y durabilidà d’o nuestro treballo, pero en reyalidà tot o que reyalmén importa, creigo, ye prebar de contribuyir a fer d’iste mundo un puesto más pleno de polideza interior y eleganzia, d’a mesma manera que en espiritualidà o que más importa ye, seguntes a mía opinión, una sinzera compasión enta toz os sers.

Dengún lusco ye perdito.
Cada esperienzia ye una fuen de conoximiento.

Cal que almita que zagueramén no he pintato tanto como quereba (y ziertamén siento como cualcosa importán me manca). Pero incluso en istos casos, l'aprendizache no atura. Cada día imos alquirindo nuebas ideyas sobre o nuestro ofizio, y mesmo cada día imos tenendo más claro qué camín ye o nuestro camín, o que millor puede espresar a nuestra singularidà, qué nos cuaca fer en reyalidà y a millor forma de contribuyir con o nuestro treballo.

Durante siete u güeito añadas (muito tiempo) no escribié prauticamén dengún poema en aragonés, y sin d’embargo recuerdo aquel tiempo como lo más poetico d’a mía bida. Con total seguranza, allora YERA un poeta, anque no escribise dengún poema. Pero contemplaba, por exemplo, cada día, con un silenzio relichioso, cuasi como rezando, os más mainificos luscos d’os disiertos, bibiba en pleno esprito de poesía sobre os empurpuratos mons d’os Montalbos.

Cuan torne a pintar más intensamén, as mías pinturas tendrán as colors de tierras de poesía, as colors de muitas y nuebas meditazions, as colors d’os fracasos d’os que aprendié una micarrona d’umildà, lizions amostratas por o Silenzio.

Cuan torne a pintar como antis feba, o feré con as colors d’as cosas rezienmén bibitas, grans y chiquetas cosas, colors de libros leyitos con o corazón, de zintas beyitas como cuan yera nino, arredolato de marabillosos suenios, con as colors de mullers y d’eleganzia, con as colors de nuebos silenzios u recuerdos recobratos, con sabors de bictorias y derrotas.

PS:) Como puedes beyer, publico en iste articlo una fotografía una micarrona “probocatiba” (anque solamén una micarrona). Si contino en ista linia, perderé parti d’o mío “prestichio”. Ixo ye muito bueno. O berdadero arte ye incompatible con un gran ego. Y a o mío ego li calen importans retalles ... Quí sape o que puedes trobar en iste blog si ritornas...

Chuan Chusé Bielsa

- As mías adrezas de correyo :
pintura@juanbielsa.com
jnbielsa@yahoo.es

- O mío blog en aragonés :
artebielsa.blogspot.com

Primera dentrada en POLIDEZA

2008-08-01T02:29:00.002+02:00

Ista ye a primera dentrada de Polideza, un blog sobre estetica y belleza en aragonés.

Ye una tematica que no ye guaire usual en aragonés, anque sí en muitas atras fablas.

Prebaremos de fer d'iste blog un puesto an a polideza en todas as suyas formas siga o filo conductor.