Moda y arte, felizmén casatos
A polideza puede adoptar muitas formas y “bestitos”.
(Foto: ÚNICA magazín)
En o Budismo Zen bi ha muitos camins ta aconseguir paz interna y sabiduría. Y en cheneral en o Chapón, por exemplo, no bi ha una clara diferenziazión entre o que poderban clamar-sen artes y artesanías. O más umilde treballo manual puede tornar-se en una mainifica endrezera enta la comprensión d’a Reyalidà más funda.
D’a mesma traza, creigo que potenzialmén muitas autibidaz pueden ser transformatas en berdadero arte si se reyalizan con umildà, esprito de reberenzia, meditazión y o nezesario (y contino, ya que nunca no remata) aprendizache. Mesmo l'aparenmén chiqueta autibidà d’escribir en un blog puede tornar-se en una esperienzia meditatiba y en un arte...
Poesía y meditazión.
A os pintors y artistas d’Orién perén lis cuacó barrechar diferens artes y disziplinas. Asinas, podemos trobar muitas begadas cómo un poema forma parti d’una pintura, describindo as sensazions y esperienzias que o mesmo artista u una atra persona ha esperimentato de resultas d’a suya contemplazión.
Siempre me cuacó ixa aprosimazión.
Y en o Zen, como ya d’antis he socherito, no bi ha particularmén artes mayors y menors.
En o anterior coinzido plenamén, ye dizir en sentiu estricto no creigo que bi aiga artes superiors a atras, si l’artista reyaliza o suyo treballo tenendo como alazez a poesía y a contemplazión. Poesía, en reyalidà (y en o sentiu en o que os antigos griegos la entendeban) ye o ligallo entre os ombres y a mente unibersal. Contemplazión y meditazión son un exerzizio de rezeutibidà, d’estar ubiertos enta una zierta transzendenzia, umildà, Silenzio. A lo menos asinas ye como yo as beigo.
Asinas, cuan m’enfrento con aparenmén mundanas autibidaz como a moda, estilos, tendenzias... beigo tot ixe mundo con os güellos d’un pintaire y un poeta, con un sentiu de reberenzia en muitos casos, i puedo beyer marabillosas combinazions de colors, delicatos matizes, beigo ritmos rebutitos de creyatibidà, testuras sosprendens. Beigo a la fin en muitos casos un onesto esfuerzo ta espresar-se artisticamén a trabiés de bestir o cuerpo umano.
Y cuan as modelos son en a pasarela en as desfiladas, si as modelos y os diseñadors fan feito lo suyo treballo con amor y profesionalidà, i puedo beyer reyals obras d’arte, un arte bibién, “body art”. Mesmo i beigo bien polidas pinturas sobre os cuerpos elegans y desfilando d’as modelos.
Frescors y eleganzias de berano
A muga ye a eleganzia.
Cuan a eleganzia ye perdita, cuasi tot ye perdito...
(Foto: ÚNICA magazín )
Os diseñadors de moda no son guaire diferens de nusatros, os pintors, Talmén beluns de nusatros creigamos tener un más gran sentiu d’a transzendenzia y durabilidà d’o nuestro treballo, pero en reyalidà tot o que reyalmén importa, creigo, ye prebar de contribuyir a fer d’iste mundo un puesto más pleno de polideza interior y eleganzia, d’a mesma manera que en espiritualidà o que más importa ye, seguntes a mía opinión, una sinzera compasión enta toz os sers.
Cada esperienzia ye una fuen de conoximiento.
Cal que almita que zagueramén no he pintato tanto como quereba (y ziertamén siento como cualcosa importán me manca). Pero incluso en istos casos, l'aprendizache no atura. Cada día imos alquirindo nuebas ideyas sobre o nuestro ofizio, y mesmo cada día imos tenendo más claro qué camín ye o nuestro camín, o que millor puede espresar a nuestra singularidà, qué nos cuaca fer en reyalidà y a millor forma de contribuyir con o nuestro treballo.
Durante siete u güeito añadas (muito tiempo) no escribié prauticamén dengún poema en aragonés, y sin d’embargo recuerdo aquel tiempo como lo más poetico d’a mía bida. Con total seguranza, allora YERA un poeta, anque no escribise dengún poema. Pero contemplaba, por exemplo, cada día, con un silenzio relichioso, cuasi como rezando, os más mainificos luscos d’os disiertos, bibiba en pleno esprito de poesía sobre os empurpuratos mons d’os Montalbos.
Cuan torne a pintar más intensamén, as mías pinturas tendrán as colors de tierras de poesía, as colors de muitas y nuebas meditazions, as colors d’os fracasos d’os que aprendié una micarrona d’umildà, lizions amostratas por o Silenzio.
Cuan torne a pintar como antis feba, o feré con as colors d’as cosas rezienmén bibitas, grans y chiquetas cosas, colors de libros leyitos con o corazón, de zintas beyitas como cuan yera nino, arredolato de marabillosos suenios, con as colors de mullers y d’eleganzia, con as colors de nuebos silenzios u recuerdos recobratos, con sabors de bictorias y derrotas.
PS:) Como puedes beyer, publico en iste articlo una fotografía una micarrona “probocatiba” (anque solamén una micarrona). Si contino en ista linia, perderé parti d’o mío “prestichio”. Ixo ye muito bueno. O berdadero arte ye incompatible con un gran ego. Y a o mío ego li calen importans retalles ... Quí sape o que puedes trobar en iste blog si ritornas...
Chuan Chusé Bielsa
pintura@juanbielsa.com
jnbielsa@yahoo.es
artebielsa.blogspot.com
